Innova programa

Ekimen berritzaile eta eraldatzaileei laguntza

Innova programak bederatzigarren edizioa bete zuen 2025ean, eta aurreko urteetako antzeko eskema bati jarraituz egin zuen, gizarte-, kultura- (ekoizpena eta sorkuntza) eta landa-proiektuak bultzatuz.

Hala, Nafarroako Kutxa Fundazioaren eta ”la Caixa” Fundazioaren ekimen honek gure gizartearentzat berritzaileak eta eraldatzaileak diren ekimenak babesten jarraitu zuen.

Gainera, aldi horretan, entzute- eta analisi-ekintza desberdinak garatu ziren, formatu eta tresna berriak txertatzeko, Komunitatean gizarte-inpaktua areagotzea ahalbidetuko dutenak.

Innova programa 2017an jaio zen, Nafarroako Foru Komunitatearen garapen berritzaileago, inklusiboago eta sozialago baten aldeko proiektuak babesteko bokazioarekin, Nazio Batuen 2030 Agendak definitzen dituen Garapen Jasangarrirako Helburuekin bat etorriz.

Prestakuntza-ekimenak eta gune kritikoak nahiz hausnarketakoak sustatzen dira, helburu hauekin: landa-, gizarte- eta kultura-ekosistema indartzea, erakunde eta sektore desberdinen arteko sinergiak eta lankidetza- nahiz kooperazio-guneak sortzea, eta helburuekin bat datozen proiektu eta ekimenetarako laguntza ekonomikoak bultzatzea.

Entzute-prozesua eta Innova Social Lab martxan jartzea

2025. urtean zehar, aurreko urtetik egiten ari zen ikerketa-lan bat burutu zen, gure gizarteko bi erronka garrantzitsu aukeratzeko.

Lau gai nagusiren (migrazioa-bizikidetza; lurralde-kohesioa-despopulazioa) aurretiko hautaketa egin ondoren, bi erronka hautatu ziren: adin goiztiarretatik baterako sozializazio-guneak sortzea Castejonen, Fiteron eta Aoizen; eta landa-eremuko ekintzailetza-gaitasuna sustatzea Erdialdeko biztanleen jakintza eta baliabideetatik abiatuta.

Ikerketa-lan hori aurkezpen-ekitaldi batekin eta lankidetzako bi tailerrekin itxi zen, eta ekintza-ildo berri bati eman dio bidea: proiektu pilotuak garatzeko laborategi bati. Innova Social Lab-ek bi erronka horiei erantzuna emango dieten lankidetza-ekimenak bilatuko ditu 2026an.

Bi erronka horietan lan egiteaz gain, Nafarroako Kutxa Fundazioak eta ”la Caixa” Fundazioak Innova Sareko erakunde eta agenteak eta eskualde zein estatu mailako erakunde erreferenteak ere sartu dituzte beren entzute-prozesuan. Horrela, berrikuntzaren eta gizarte-inpaktuaren esparruan garrantzitsuak diren 16 pertsonaren arteko topaketa bat antolatu zen, eta, bestalde, Innova esparruan “La brújula” izeneko analisi-ariketa bat garatu zen (179 erantzun bildu zituen inkesta eta sektoreko lau tailer, non 30 pertsonak hartu zuten parte). Ekimen horietan bildutako informazio guztia fundazioek partekatzen dituzten deialdietan berrikuntzak sartzeko erabili da.

Cafuné, Innova programak babestua, animaziozko film labur onenaren Goya saria 2025ean

2025. urteak mugarri handi bat utzi zuen Innova programarentzat. Ekoizpen-arloko kultura-eremuko ikus-entzunezko proiektu batzuek lortuak zituzten Goya sarietarako izendapenak aurreko edizioetan, baina 2025eko galan iritsi zen lehen saria.

Iruñeko Dr. Platypus & Ms. Wombat estudioak ekoitzitako “Cafuné” lanarentzat izan zen; animaziozko film labur onenaren saria eraman zuen.

Proiektu honek Innova programaren laguntza jaso zuen 2021eko edizioan, Lorena Ares eta Carlos Fernández de Vigo proiektua lantzen hasi zirenean.

Sari hori bultzada handia izan zen Innova programarentzat; izan ere, Goya sari honek edizio bakoitzean aukeratzen eta babesten diren proiektuen kalitate-estandarra berresten du.